Mitsui Ўзбекистонда уран қазиб чиқарувчи қўшма корхона очиши мумкин

12.uz - Япониянинг Mitsui & Co., Ltd. концерни Ўзбекистон геология ва минерал ресурслар бўйича Давлат қўмитаси билан уран қазиб чиқарувчи қўшма корхона очишни кўзда тутадиган шартномани имзолади.
Mitsui хабарида айтилишича, имзоланган ҳужжат бир ярим йил давомида Кўкпатас конида биргаликда қазиш ишларини олиб бориш борасида Давлат қўмитаси билан эксклюзив келишувлар олиб бориш имконини беради.
Мабодо, лойиҳа тижорат босқичига чиқадиган бўлса, қазиб олинадиган уран атом электростанцияларига экспорт қилинади, дейилади хабарда.
Mitsui – Ўзбекистондаги уран ресурсларини қайта ишлашга уринаётган ягона япон компанияси эмас. Ўзбекистон геология ва минерал ресурслар бўйича Давлат қўмитаси 2006 йилнинг ноябрь ойида Itochu корпорацияси билан ҳам шундай йўналишдаги шартномани имзолаган эди.
Ўзбекистон йилига 2,5 минг тонна уран қазиб чиқаради ва ушбу кўрсаткич бўйича жаҳонда 5-ўринни эгаллайди.
МАГАТЭ маълумотларига кўра, Ўзбекистонда жаҳондаги уран заҳираларининг 3% жойлашган.