Олий ўқув юртларига ҳужжат қабул қилиш поёнига етмоқда

12.uz - «Бу ҳафта мамлакатимиз олий ўқув юртларида 20 июндан иш бошлаган қабул комиссиялари ҳужжат қабул қилишни якунлашади. Давлатимиз раҳбарининг Қарорига кўра бу йил квота бўйича бакалаврларни тайёрлаш кундузги бўлимларига 58000 ўрин берилган», - дея 12.uz мухбирига хабар беришди Ўзбекистон Олий ва ўрта махсус таълим вазирлиги матбуот хизматида.
Матбуот хизмати вакилининг сўзларига кўра, махсус сиртқи бўлимларга 5605 нафар, магистратурага эса 5500 одам қабул қилинади. Кириш имтиҳонлари одатдагидек биринчи август куни бўлиб ўтади.
Тест синовлари ўтказиш тартибида ҳеч қандай ўзгариш бўлмаслиги, аввалгидек абитуриентлар уч фан бўйича саволларга жавоб беришлари таклиф қилинишини матбуот хизматида алоҳида таъкидлашди. Бу йилги ўқув йилининг янгилиги – студентларни қабул қилишни бошлаган Сингапур Менежментни ривожлантириш институтининг Тошкент филиали ҳисобланади.