Тўрт нафар абитуриентни чув туширган фирибгар қилмишига яраша жазосини олди

12.uz - Термиз шаҳар жиноят ишлари бўйича судининг судьяси Акбар Хабибуллаевнинг маълум қилишича, шаҳар суди томонидан фирибарлик йўли билан ўзгаларнинг маблағларини ўзлаштирган Икром Хидировга уч йил муддатга озодликдан маҳрум этиш жазоси тайинланган.
Судда қайд этилишича, Икром Хидиров Термиз университетида таниш домлалари кўплиги, улар орқали ўқишга жойлаб қўйиш имконияти борлигини рўкач қилган ҳолда тўрт нафар абитуриентдан 5 минг АҚШ долларидан кўпроқ маблағни ундириб олишга эришади. Кейин эса ёшларнинг қўлига қалбаки шартнома тутқазиб, ўзини четга олади. Ўқишга киролмай қолган ёшлар Денов-Термиз ўртасида бўзчининг моккисидек қатнаб чарчашади. Охири ота-оналари ўртага тушиб, иш судга ошади.
Суд қарорига кўра жабрланувчиларга етказилган моддий зарар айбланувчи томонидан тўла қопланди.