WBA қарори Чагаев фойдасига бўлди.

12.uz - Бутунжаҳон бокс ассоциацияси (WBA) ўта оғир вазнда амалдаги жаҳон чемпиони Руслан Чагаевнинг олган оғир жароҳати («тўлиқ пайларнинг узилиши») ни инобатга олиб, чемпионлик камари ҳимояси муддатини 2009 йилнинг 26 июнига қадар чўзишга қарор қилиб, Дон Кинг бошчилик қилаётган ундан чемпионлик камарини тортиб олишни талаб қилувчилар гуруҳини аросатда қолдирди.
Маълумки, Валуевнинг менеджери Борис Димитров ва таниқли америкалик промоутер Дон Кинг WBA чемпионлик камарини Чагаевдан олиб қўйиб, Валуев билан рейтинги бўйича тенг бўлган бирор бир бошқа боксчи – америкалик Жон Руис ўртасида жанг белгиланиши лозимлигини айтишаётган эди.
WBA бу «талаб»ни ҳам қойилмақом тарзда қондирди. Талаб қилинганидек, Валуев Руисга қарши жанг ўтказадиган бўлди. Аммо бу жуфтлик чемпионлик камари учун баҳс олиб бормайди. Ўзаро баҳс ғолиби кейинроқ Чагаевга рўбарў бўлади, холос.
Ўтган душанба куни Германия футбол терма жамоасининг шифокори Томас Буххорн томонидан Чагаевнинг операцияси муваффақиятли амалга оширилди. Чагаев врачларнинг сўзларига таяниб, шу йилнинг охирларида яна рингга чиқиши мумкинлигини билдирди.
Эслатиб ўтамиз, ўтган пайшанба, 26 июнь куни тушдан кейин спарринг машқлари якунланай деб қолган бир пайтда Руслан Чагаевнинг чап оёғининг нозик пайлари лат еган ва Гамбург шифохонасида тиббиёт ходимлари унга «тўлиқ пайларнинг узилиши» ташхисини қўйишган эди.
Ўзбек бокс мактабининг ёрқин вакили Чагаев Валуев устидан қозонилган ғалабадан кейин 2008 йилнинг январида британиялик Мэтт Скелтон устидан очколар бўйича устун келган. Россиялик боксчи эса ўтган йилнинг сентябрида канадалик Жан-Франсуа Бержеронни очколар бўйича, шу йилнинг февралида эса белорус Сергей Ляхович устидан ғалабага эришган эди.