Ўзбекистон экологик ҳаракатида янги нашрлар тақдимоти бўлиб ўтди

12.uz – 2010 йил 15 март куни Ўзбекистон экологик ҳаракатида “Ўзбекистон табиати” альбом-китоби, “Булоқча”(“Родничок”) болалар экологик журнали лойиҳаси ва чоп этилган бошқа нашрлар тақдимотига бағишланган матбуот анжумани бўлиб ўтди. Ўзбекистон экологик ҳаракати Матбуот хизматига хабарига кўра, анжуманни Ўзбекистон экологик ҳаракати Марказий Кенгаши Ижроия қўмитаси Раиси, Ўзбекистон Республикаси Олий Мажлиси Қонунчилик палатасининг Экоҳаракат депутатлари гуруҳи раҳбари Борий Алихонов қисқача кириш сўзи билан очди. Нотиқ ер юзининг бирор бир жойида Ўзбекистонда бўлганидек тўрт фаслни бир вақтнинг ўзида ёнма-ён учратиш қийинлиги, сеҳрли ўлкамизнинг табиатига мафтун бўлиб боқишнинг ўзи кифоя эмаслиги, бу бебеҳо бойликни асраб-авайлаш лозимлиги ҳақида гапирар экан, чоп этила бошланган “Ўзбекистон табиати” альбом-китобининг нашр этилиши мамлакатимиз маънавий-маърифий ҳаётида катта воқеа эканлигига алоҳида тўхталиб, ушбу нашр Экоҳаракатнинг бу борадаги дастлабки қадами эканлигига тўпланганлар эътиборини қаратди. Шунингдек Ўзбекистон экологик ҳаракати ўсиб келаётган баркамол авлоднинг экологик тарбиясини кучайтириш йўлида ҳам эзгу ишга қўл уриб, кичкинтойлар учун “Булоқча” (“Родничок”) экологик журналини нашр этишга киришиш арафасида эканлигини, экологик йўналишдаги китоблар чоп этишга эътибор кучайтирилаётганлигини, атроф муҳитга зарарсиз, экологик тоза технологияларни амалиётга жорий этиш борасидаги ташаббуслар кенг қўллаб-қувватланаётганлигини қайд этди.
Дарҳақиқат, Экоҳаракат томонидан чоп этила бошланган ва дастлабкиси Қашқадарё вилоятига бағишланган “Ўзбекистон табиати” альбом-китобининг ёш авлоднинг экологик тарбиясида, уларни Она табиатга меҳр-муҳаббат руҳида камол топтиришда аҳамияти каттадир. Анжуманда сўзга чиққан Ўзбекистон экологик ҳаракати Матбуот хизмати раҳбари Т.Қамаров ана шулар ҳақида гапирар экан, альбом-китобда матнлар ўзбек, рус ва инглиз тилларида эканлиги хорижда ҳам мамлакатимизнинг бетакрор табиати ҳақида тўлароқ маълумот олишга имкон яратишини таъкидлади. Экоҳаракат томонидан мамлакатимизнинг барча вилоятларига бағишланган худди шундай альбом китоб нашр этилиши кўзда тутилган. Ушбу ижодий лойиҳа асосида альбом-китобнинг мамлакатимиз табиатига бағишланган якуний нашри чоп этилади. Анжуманда сўзга чиққан нотиқлар нафақат Қашқадарё вилоятининг ўсимлик ва ҳайвонот дунёси, умуман мамлакатимизнинг бой, бетакрор биологик хилма-хиллиги бундан ҳам йирик нашрлардан янада кенгроқ ўрин олса, бу борадаги ишлар янада кучайтирилса мақсадга мувофиқ бўлишини уқтирдилар.
Матбуот анжуманида Экоҳаракат фаоллари Саидмурод Мамашокиров ва Элдор Усмоновлар қаламига мансуб “Барқарор тараққиётнинг экологик хавфсизлик масалалари” китоби тақдимоти ҳам бўлиб ўтди.
Атмосфера ва атроф муҳит мусаффолигини таъминлашда автотранспорт воситаларини ва қишлоқ хўжалик техникаларини экологик тоза ёқилғи билан ишлашга ўтказиш муҳим аҳамиятга эгадир. Анжуманда Экоҳаракат томонидан бу борада ҳам ибратга лойиқ ишлар амалга оширилаётганлиги ҳақида фикр юритилди. Жумладан, Экоҳаракат фаоллари томонидан Тошкентдаги “Gazfmir-PRO” маъсулияти чекланган жамиятда автобуслар, юк машиналари ва қишлоқ хўжалик техникаларида газодизель мосламасини қўллаш муваффақиятли синовдан ўтганлиги диққатга сазовордир. Матбуот анжуманида ушбу янгилик ҳам атроф муҳит муҳофазасида муҳим аҳамият касб этиши алоҳида эътироф этилди.
Экоҳаракатнинг самарқандлик фаолларидан бири, “ГЛОБАЛ ЭКОТЕХ УРГУТ” маъсулият чекланган жамият раҳбари Акмал Қиёмовнинг автотранспорт воситаларидан чиқаётган ва атроф муҳитга катта зарар етказаётган ис газини 90-95 фоиз ушлаб қолиш қувватига эга экофильтр мосламаси лойиҳаси ҳам матбуот анжумани иштирокчиларида катта қизиқиш уйғотди. Агар ушбу янгилик амалиётга жорий этилса, нафақат Ўзбекистонда, балки бутун дунёда атмосфера ҳавосининг мусаффолигини таъминлаш йўлида катта қадам ташланиши мумкинлиги анжуманда эътироф этилди.
Оммавий ахборот воситалари ходимларининг саволларига атрофлича жавоблар қайтарилган анжуман мунозараларга бой руҳда ўтди.