Бахтсиз ҳодиса оқибатида йўловчилардан 6 нафари воқеа жойида ҳалок бўлди

12.uz - 2010 йил 11 май куни соат 18-45 ларда Тошкент шаҳрининг Бектемир туманида ҳайдовчи Р.Хамидов бошқарувидаги «ГБА-СПГ-ЛАЗ-695» русумли, 10 D 584 АА давлат рақам белгили автобусни Ж.Остонов кўчасидаги бекатда тўхтатиб, йўловчиларни тушираётган вақтида транспорт воситасининг газ ёнилғиси мосламаси билан боғлиқ бахтсиз ҳодиса рўй берган.
Ўзбекистон Республикаси ИИВ матбуот хизматига кўра, оқибатда йўловчилардан 6 нафари воқеа жойида ҳалок бўлган, 11 нафари турли даражадаги тан жароҳати билан шифохонага ётқизилган.
«Тошкент оқшоми» газетасида ёзилишича, мутасадди ташкилотлар томонидан воқеа жойида ҳодиса оқибатларини бартараф этиш, жабрланганларга тиббий ёрдам кўрсатиш бўйича шошилинч чора-тадбирлар амалга оширилди.
Ҳалок бўлганларнинг оилаларига ва жабрланганларга ёрдам кўрсатиш бўйича бошқа зарур ишлар ташкил этилди.
Тегишли идоралар томонидан содир бўлган ҳодиса юзасидан суриштирув ишлари олиб борилмоқда.