“Бунёдкор” бразилиялик Луизао билан ҳимоя чизиғини кучайтирмоқда

12.uz - Бугун Луиз Карлос Насименту Жуниор, оддий қилиб айтганда, Луизаони жамоатчиликка “Бунёдкор” аъзоси сифатида расман таништириш маросими ўтказилиши режалаштирилмоқда.
“Бунёдкор” клубининг расмий сайти хабарига кўра, у универсал ўйинчи саналади ва шу боис, таянч ярим ҳимоячиси позициясида ҳам бемалол тўп суриши мумкин.
Луизао 1987 йил 3 январь куни Бразилиянинг жануби-шарқидаги Эспириту-Санту штатининг Варжен-Алта муниципалитетида (бу Рио-де-Жанейро шаҳрига яқин) туғилган.
Луизао (бўйи – 184 см, вазни – 79 кг) “Крузейро” клубининг тарбияланувчиси ҳисобланади. У шу клубнинг ёшлар жамоасида 2004-2005 йилларда ўйнади. 2005-2007 йилларни эса у асосий жамоада ўтказди. Клубнинг бош жамоасида Луизао 2006 йил 23 апрель куни дебют қилди: “Крузейро” шу куни Бразилия чемпионати учрашувида ўз майдонида “Гремио”ни енгди - 3:1. Профессионал футболчи сифатидаги илк голини эса дебютидан роппа-роса бир ҳафта ўтиб (2006 йил 30 апрель куни) нишонлади: мамлакат чемпионати баҳсида сафарда “Фигуеренсе” мағлуб этилди - 2:0.
Лотин Америкаси вакилига 2007 йили Швейцариянинг “Люцерн” клубидан таклиф тушди ва бразилиялик ижрочи европаликлар билан шартнома имзолади. Бироқ шартнома тузилганидан сўнг, Луизао “Люцерн”да бирорта ҳам учрашув ўтказмади. Уни ватанига – “Васко да Гама” клубига ижарага бериб юборишди. “Васко” сафида футболчи 2007-2008 йиллар мавсумида ҳаракат қилди. Ўша маҳалда унга, “Васко да Гама”дан ташқари, шунингдек, яна Португалиянинг “Бенфика”си ҳам қизиқиш билдирганди. Луизаонинг Бразилия ёшлар термаси (U-20) таркибида Канадада ўтган ЖЧ-2007даги иштирокидан кейин, ёш истеъдод Италиянинг “Интер” клуби селекционерлари кўз остига ҳам тушди.